Að lýðræðið njóti vafans.......?

Þetta kom upp í hugann þegar ég las frétt um að fulltrúar VG og Samfylkingar höfðu uppi athugasemdir varðandi tilnefningu Guðlaugs Sverris OR stjórnarformans sem varamans í borgarráð. Téðan Guðlaug valdi Óskar Bergsson sér sem meðreiðarsvein þar sem þeir væru um margt sammála og hefðu líkar áherslur að eigin sögn. Einnig var eftir honum haft að afsögn Marsibilar hafi gefið honum frjálsari hendur með val á samstarfsmanni.  Hélt ég að röðun á framboðslista réði mestu þar um en mannvalið á borgarstjórnarlista Framsóknarflokksins hefur víst rýrnað svo horfir til óefnis og eru þá góð ráð dýr. En eitthvað sáu fulltrúar minnihlutans í borgarráði því til foráttu að varamaður framsóknar í ráðinu væri valin af oddvita en röðun á framboðslista ekki látin ráða. Þó reglur kveði ótvírætt á um að aðalmaður í borgarráði skuli vera kjörinn borgarfulltrúi fundust engar reglur beinlínis þar að lútandi varðandi varamann. (Ekki finst mér nema sjálfsagt að sama gildi um varamann og aðalman hvað varðar hæfi til setu í ráðinu) En þar til botn fæst í málið hefði maður ætlað að framsóknarmenn hafi til að bera þá háttvísi að tefla ekki fram hinum umdeilda varamanni. En því var nú ekki að heilsa, heldur situr Guðlaugur borgarráðsfund við fyrsta tækifæri. Mér finnast þessi vinnubrögð ekki til að auka traust og tiltrú kjósenda á stjórnmálamönnum líkt og Borgarstjóri sagði vera eitt af mikilvægari verkefnum nýja meirihlutans í borginni. Veit annars einhver hvar þetta mál stendur, eða er að skapast sú vinnuregla innan borgarinnar að varamenn borgarráðs þurfi ekki að vera kjörnir fulltrúar eða næstu menn á lista viðkomandi framboðslista ?