Jólahugleiðing Margrétar.........

Sælt veri fólkið og gleðilega hátíð.

 ´Eg stóðst ekki mátið að deila hér með ykkur þessari hugvekju konu, sem er mér lítillega tengd ef svo má að orði komast. Verð að segja að þessum orðum er ég sammála hvað sem líður hinni þungu evrópu-undiröldu sem nú virðist steðja að okkur úr ólíklegustu áttum. 

Með hátíðar-kveðju,

Geir Guðjónsson

"Jólin 2008  

         Sjaldan hafa mér fundist jólin vera boðberi bjartari og betri tíma en núna.  Meðan að vinsælasta viðkvæðið hefur verið  ” Það er allt að fara til fjandans ” þá kvikna jólaljósin eitt af öðru  eins og í fyrra og árin þar áður. Og ef við réttum aðeins úr kreppunni rifjast upp ein og ein smákökuuppskrift og við komum auga á rykuga kóngulóarvefi sem réttast væri að þrífa burt með vatni og sápu.  Svo ekki sé nú talað um hvað jólasveinar eru skemmtilegri en bankastjórar.  Í gömlum sið voru jólin  hátíð ljóssins sem i vændum var með hækkandi sól , og oft hafa menn séð myrkrið svartara í harðindum liðinna alda en við á þessum tímum nýjustu tækni og vísinda. 

             Frá því að fyrstu landnámsmenn settust hér að, frjálsir menn í frjálsu landi, gegnum niðurlægingartímabil  undir danakonungum , og svo aftur nýfrjálsir menn , hefur í dimmasta skammdeginu verið haldin hér hátíð vonar um bjartari tíð.  Oftar en ekki hefur vorað á ný.      Mér finnst mikilvægt að muna það núna þegar erfiðleikar steðja að og okkar kjörnu fulltrúar , sem við treystum til að stjórna landinu okkar, dettur ekkert annað í hug okkur til bjargar, en að flýja í evrópubandalagið.     Verandi sjálfir búnir að klúðra málunum  allrækilega .  Hei, það eru ekki alltaf jólin en þau koma  þó á hverju ári.        

          Nú ljóma augu  litlu strákanna minna af tilhlökkun eins og augu annarra barna í gegnum  tíðina .  Þeir eru ekki með hugann við botnlaus skuldafen eða óstöðugt gengi krónunnar.    Meðan þeir leika sér áhyggjulausir að jólagjöfunum sínum ættum við að einbeita  okkur að því að gæta sjálfstæðis landsins fyrir evrópusinnum , og  sjá til þess að þegar að því kemur, muni þeir erfa land sem er frjálst og fullvalda.  

             Frelsið er vandmeðfarið en þó að ”vér hálfvitar” sem farið hafa með það undanfarið, hafi ekki skilið það þá trúi ég ekki öðru en næsta kynslóð verði gáfaðri.                               

   Gleðileg  frjáls og fullvalda jól í sjálfstæðu ríki.                                                                                            Kveðja, 

Magga og fjölskylda.        "